مشكلة العربجي اذا صار رومنسي..

[مـاجدونـا]

تصير مشكلتة مشكلة ويصير عنده عجز في تركيب الافكار والالفاظ
وتتفاقم مشكلته ويصير مالها حل

بالله خليكم معاي في هذا التعبير الرومنسي لأحد المشحششين
وهو يعبر لحبيبته عن ما يدور بمشاعره


حبيبتي


لقد احتريتك كثيراً .. ولم استطع النوم
قد تقولين ... لأنك مقيّـل
قد تقولين .. لانك شاربن شاهي
قد تقولين وتقولين وأنا صامت
وأقول فى نفسي إلى متى دق الركب والتزليب
أفهم يالبيب


......

سيدتي الجميلة


إني مشتاق ... وأضناني الفراق
أرأيتي شوق الديك إلى الشروق
أرأيتي شوق الحريم إلى السوق
أرأيتي شوق أبوي إلى النوق
ما يخالجني أعظم


......


حبيبتي


كفاك لعباً مع البزارين.. سأشتري لك ما تريدين
إن أردتي حلاو بقر فهي لك .. إن أردتي بكله فهي لك
إن أردتي أن نذهب لملاهي عطا الله فهي لك .. انقلعي الله يقلعك
سأشتري لك هديه.. روح معنويه


.....

حبيبتي


لم أعد أطيق الإنتظار
كأنني في المطار
عودي مالت عليك
مالت علي
ومالت على أمتك اللي جابتك




.....

حبيبتي


ارحمي هذا الحيا المسكين.. لم يرى النور منذ مبطي
أخرجي أصابعك من أذنيك واسمعيني
قد يصيبك الصمخ
بمرور الوقت يطول ظفرك وهو بداخل أذنك
عندها لن تستطيعين أن تطلعينوه


........


حبيبتي


ما كل هذا الوصخ على قميصك
أتراك لم تغسليه
أتراك .... لا تريدين ذلك ...
ما أكبر هذا القلب .. وما أرق هذا الوجدان
إلى هذه الدرجه .... تعطفين على المجاري
ولاتريدين الاسراف في المياهو


.......

حبيبتي


مالي أراك مطيّرتن عيونك
أود أن أعرف إلى متى
إلى متى
إلى متى هذا الصمت
كأني بك تتحكحكين
ربما بسبب عدم التروش إلا في العيد


تحياتي لحمود الاقرع...


وتمنياتي لكم بالتوفيق..


مــاجدونــا...ملك الكلمه...

[خليك بالشارع]

سوالف القهاوي
|*¨®¨*|للسوالف والقصص الخمبقيه التي يكتبها أعضائنا بأنفسهم |*¨®¨*|

ومعنى إضافتك للموضوع أخوي ماجدونا في قسم سوالف القهاوي .. يعني الموضوع من إبداعك الشخصي ..

لأننا قلناها 99999 مرة .. سوالف القهاوي هي سواليف ينتجها لنا مخك .. وللمرة المليون سوالف القهاوي لموضوع يخرج من مخ العضو المرقابي إلى صفحة المنتدى مباشرةً ..

وموضوعك موجود نفسه على هذا الرابط .. بتاريخ 16 - 3 -2005 .. وأنا مانيب أقول ان هو كاتبه الأصلي بعد بس أكيد ناقله من منتدى ثاني ..

http://64.27.7.99/showthread.php?t=20110

ماجدونا أنا ما أقصد بهالكلام تجريحك أو إحراجك .. لا ورب البيت .. ولكن تخيل انك قعدت اسبوع كامل تكتب وتنقح في موضوع ومرات تسهر عليه وأيام تروح الدوام ثاني يوم متأخر بسبته وتنزله في منتدى من ذا المنتديات وبعد فترة تلقى واحد ثاني منزله في منتدى ثاني وناسبه لنفسه .. وش بيكون شعورك وقتها!! .. ما راح تحس بالقهر .. ولا راح تحس ان تعبك وجهدك ضاع على الفاضي وسرقه منك واحد ثاني بمجرد عملية كوبي بيست واحدة!!

أنا أدري انك ودك تكتب موضوع مثل ذا الموضوع وتقدر تكتب أحسن منه ان شاء الله .. بس يبيله تعب وجهد ومثابرة قد تستمر معك سنين إلين تقدر تكتب أول موضوع ينال إعجاب القراء .. ولكنك في الأخير صار لك موضوع الكل يشيد فيه :) .. موضوع حقك انت وينسب لك انت وحدك :) ..

على العموم الموضوع ذا المفروض يروح لكازينو المرقاب .. للمواضيع الترفيهية المنقولة من المنتديات الأخرى :) ..

ولكن إسمحلي أثبت الموضوع يا ماجدونا علشان يستفيد منه الجميع .. وبالأخير تبقى أخ وعزيز إن شاء الله :) ..

وإن شاء الله راح أتفرغلكم وأكتبلكم سلسلة مواضيع لكل من أراد أن يصبح مبدعاً ينافس المبدعين بأفكاره الإبداعية .. وراح أعلمكم الخطوات خطوة بخطوة .. وكيف حتى تألف النكتة أنا راح أعلمها لكم بقاعدة بسيطة جداً ان شاء الله .. وراح أفضحلكم كل أسرار الكتابة الإبداعية الكوميدية .. من مرحلة الإلهام .. إلى الإنتاج والتنقيح .. إلى الدعابة .. إلخ .. وأمنية حياتي أن أرى كل من في المرقاب مبدعين لأنه بكذا راح يصير ينافس أقوى المنتديات .. وبالعكس قد تروني أعاملكم بجفاء أحاول أحرجكم بأسلوب أو بآخر من قبل ولكن والله ثم والله كل هذا مهوب كره لكم .. الحقيقة بسبب إني لاحظت في منتديات المرقاب تفشي سالفة نقل الموضوع ونسبته لناقله عندنا .. يعني بالله وش الي راح يجبر زائر أو قارئ يدخل المرقاب ما دامت المواضيع الي فيه كلها يمديه يقراها في منتدى ثاني :) ؟؟!! .. والمشكلة يومي فكرت بإنشاء سوالف القهاوي كانت الفكرة هي الرقي بأعضاء المنتدى .. ولكن الي زاد الطين بلة صار سوالف القهاوي يعتبر مخزناً أو مخبأاً للمواضيع المسروقة بدلاً من أن يكون منبراً للإبداع الساخر :) ..

فهمت وش أقصد?? ..

وطبعاً الكلام ذا مهوب موجه لماجدونا بلحاله بل لأكثر من واحد وصدقوني ما راح أعرف مستواكم إلا إذا شفت إبداعاتكم انتم وبعدين راح أقوم بتقديم النصح والأخذ بأيديكم .. وانا داري ان ذا الحكي كله المفروض انه ما طلع مني .. لأنه فيه كتاب بالإنترنت أجدر وأحق مني بقول هذا الكلام .. لكن وش اسويلكم هذا الي عندكم .. مالكم إلا خليك بالشارع في الوقت الراهن ..

وتمنياتي لكم بالتوفيق..


مــاجدونــا...ملك الكلمه... <=== ووش هي الكلمة الي امتلكتها؟!! .. سيسألك السؤال هذا أحدهم يوما .. فخل عنك سوالف صدام حسين ومعمر القذافي ولا تلتفت إلى المطبلين ترى المثل يقول الله يرحم من بكاني ولا يرحم من ضحك علي الناس :) ..

تحياتي لحمود الأقرع ..

[جراح]

أمش يا بو رمش ...




1 / صفر

[مـاجدونـا]

اول شي..اشكرك لمرورك الجميل الراقي ..وتثبيتك للموضوع..


وثاني شي..اشكر من خالص قلبي على النصيحه ..وانا احس اني عرفت شي كنت فاقده..

وتحياتي لك ..


سلامي لخليك بالشارع..