هلت دموع العين ...... ابي مشورتكم

[نجم الهوى]

مازلت في بدايتي واتمنى منكم المزيد من المشوره
قصيدة جديدة تنتظر منكم الحكم


هلت دموع العين يوم السفر حان ... يومه حلفت وقلت ما والله انساك
يحفظك ربي خالق الانس والجان ... ويحميك من عين الحواسد وياقاك
مدت لي يدها وقالت ارجوك يافلان ... عطني يمينك لجل اعاهدك منساك
وتبقي بقلبي لين اغطى بالاكفان ... ويموت قلبي ماهوى غير دنياك
قلت ارحلي حبك على الصدر نيشان ... ولي الفخر لاقلت انا اعشقك واهواك
قالت وداع وبعدها النور مابان ... روحي عسى دروب السعادة تلقاك
خلاص ياعيني ترا فات الاوان ... وش فايدة هالدمع ياعين انا ارجاك
نرحل انا وانتي وهمي والاحزان ... ونسكن بدنيا الورد فيها كاالاشواك
حتى يقولون اللقاء موعده حان ... يومه باعلى الصوت انا اقول اهواك

لاتنسون اني محتاج مشورتكم على شان استفيد


تنوية :
بصراحة انا ودي استمر وادخل كل يوم الموقع لكن الدراسة تمنعني لان مستقبلي اهم
اتمنى ماتقولون عني مقصر ومدخل لكن كل مالقيت فرصة دخلت واستفدت من موقعكم



تحيااااتي لكم
اخوكم نجكم الهوى

[سلطان بن فيحان]

هلا اخوي نجم الهوى اعتقد هاذي المشاركه الثانيه او الثالثه على العموم صح لسانك ولاهنت ومعذرينك دام بينت ظروفك قصيدتك جميله ولكن الوزن به حاجه بسيطه باعتقادي ولايهمك يالحبيب انشاء بنساعدك ونوجهك وبنتظار التعقيب من الاخوه الشعراء ووجهات نظرهم

ملاحظه ؛؛؛؛؛؛؛
البيت رقم 3 على ماعتقد به شويه (((((مدت لي )))))

[نجم الهوى]

اشكرك اخوي شاعر الصمت بس ليت تبين لي
وتعطيني رايك وتوضح لي اكثر



تحياااتي لكم
اخوكم نجم الهوى

[سلطان بن فيحان]

اخوي نجم الهوى لاهنت حبيبي لانك اول واحد طلب الفائده وجاي يتعلم بس باقولك شي اولا لاتخلي الشعر ياخذ وقت وتضيع دراستك مثلي انا اهتميت بالشعر على حساب الدراسه ثانيا راح اساعدك بشرط تتفهم اخطاءك تعال راجعت موضوع كيف تعرف ان قصيدتك موزونه انا مثبت الموضوع عشانك على العموم راح اوريك اخطاك واعدلك بيتين فقط وانت قيس على الابيات الثانيه وحاول تتعرف على الاخطاء بنفسك مثلا بعض ابياتك راجع ما اكتبه واقراء قصيدتك وتشوف الفرق يالله

هلت دموع العين يوم السفر حان********يومي حلفت وقلت ماولله انساك


مدت يديها قالت ارجوك يافلان ********عطني يمينك لاجل اعاهدك منساك

هاذا من جهه من جهه اخرى حاول لاتكرر المفرده في القصيده اكثر من مره مثل (((انساك***منساك))حاول تغير
وتقبل جزيل شكري وامتناني على طموحك الجيد وقدومك للاستفاده بس مثل ماقلت لاتكون على حساب دراستك وعلى قوله الشاعر سليمان المانع

ياشينها لاصرت بين اختيارين***مستقبلك والا حبيب توده